MURKONG AMÍNG

Horen Koptak


Ta:tobí aginpé rokompé darobla gordu:do Matsígdém tukoksula Kangkung adi:pé gílendak. Yumdéng a:yémílo ta:tobí otén ao Budjer, Budbor bulum donamém rébombidakku. Ídíloi ídíloi koyémílo Budjerbulum murkongémsin barngo baryingko bidag. Longékoném Budjer bí la: Budbor bí atodém taukang. Ta:ta no migom agerkosin germang, aríg ísíng koré rénamkosin kabegmang, okolok pa:dang murkongém? Matsíg gékoksuyémíloi pa:dang ne? Gíangkumíloi gordu:do bíkogla Budjer bí atodém taddak. Atodé ídílosin lubisumang. Ngo murkong amíngém letung,nolusin bottamílo murkong amíngém lepa:yé émna lubito. Murkong amíngé! Budjer Budbor bí murkong amídé kapidang,aipé ka:língé upokkang. Budjer Budbor bí aso aso:pé ya:me: me:la bottédung. Ager atí germa:pé émpé gígo:la du:namdém anna longéko atodé Budjer Budbor mé Kangkung adi: rakud talé:do bomjé mo:takko Enge, Ma:yong, Ali, Pagli oying ba:ri ikodo:pé gíbola Budjer Budbormé ka:boto, odokké bínnyém enge Ali ngunna jo:bomlangkula kéra:pé du:né ukurbar bojardo koboto. Jelab bi:dopé murkong pa:la Budjer Budbor bí mé:pokang. Édé longédokké bínnyík annyidé agerém gerkangku. Atodé luto- antobon, angupé murkong amíngé kamang. Sémpé ba:ri ila ko:réd komílo murkongém pa:dak, odokké sé:bului ngoluk murkong amíngé. O, édémpéi ta:ta émna Budjer Budbor bí Ta:todém gonggapto.