Madgo,Tapan Lal,Mising Poem

 

Madgo

 Topon Lal

Sido airupé tain:é

Gíyi-gísa:dag

Do:nyi lí:sa:lokké

Do:nyi oa:lo:pé

Kébangém ba:dungarnémpé

Tani:é gíkumsudag

Émpige:l tarungém ru:ma:

Gomugém tadbegma:

Je:id-po:midé !

Sido okkoi du:song

Sé:kosin sé:komsin lubimang

Amig pirnyaudé bérrígmínsu:l

Agomém ludag

Lé:su: lé:sula

Sé bélamsé po:pékéboi sémmí:pé dung

Gía:né tani kídí:dépag angubomdung

Édílai sido yummémsin 

Í:r pongkírdag longngarémpé

Mé:dír mé:so:l gía:né taniésin

Mé:po ménganna gílendakku

Aropé

Sido okkoi du:song

Sé:kosin sé:komsin lubimang

Amig pirnyaudé bérrígmínsu:l

Agomém ludag

Lé:su: lé:sula

Sido kénongém réla pa:dag

Sido mí:boém réla pa:dag

Sido murkongong agomém ludag 

Édíloi kéno:yem réla donamém

Édílai pí:ramyem kola donamém 

Sido ka:begdag

Émpige:l pí:ramnam agomém

Sékké tatkolosin lumang

Rénam-konamém ngosin kangkítag madgolo

Émpige:l turné tanilok adín konamém kangkímang

Siyum siro sido

Ayangémsin réla pa:dag

Sé oko madgoisong

Ngo édílosin kangkímang

Édílai sé madgoso

Aíémsin kopaksunamém ka:begdag

Síddíné madgoso

No okkoma:r réye:n

Síddíné madgoso

No okkoma:r koye:n

Édé mé:miru:pénamko !

Turnamsé émmum agommang

Amié lupéké émna du:motsu:l du:pagnammang

Turnamsé madgolok konam-rénam

Atta:r abangongko

Édíloi no aíém kopaksupayesong

Édíloi okkom répa:yesong

Kinpísula:mang